ཞབས་དྲུང་སྐུ་མཆོད་དང་འབྲེལ་ གཞུང་གྲྭ་ཚང་དབུ་བརྙེས་ཏེ་ མི་ལོ་ ༤༠༠ འཁོར་བའི་དུས་སྟོན་བརྩི་སྲུང་ཞུ་ནིའི་དོན་ལུ་ འབྲུག་རྒྱལ་པོ་ མི་དབང་མངའ་བདག་རིན་པོ་ཆེ་མཆོག་གིས་དབུ་གཙོས་ མི་དབང་འབྲུག་རྒྱལ་བཞི་པ་མཆོག་དང་ སྐུ་འཁོར་ལྷག་རྒྱས་ཀྱིས་ སྤུངས་ཐང་བདེ་བ་ཆེན་པོའི་ཕོ་བྲང་ནང་ སྐུ་དངོས་སྦེ་ཞབས་ཀྱིས་བཅགས་གནང་ཡི། ཞབས་དྲུང་རིན་པོ་ཆེ་གི་ མཐོང་གྲོལ་འདི་ཡང་མཇལ་ཁ་གནང་ཡོདཔ་མ་ཚད་ དད་ལྡན་མི་སེར་ཡོངས་ལུ་ འབྲུག་པའི་ནང་རྟེན་གཙོ་བོ་ རང་འབྱུང་ཁ་ཙ་པ་ཎེ་ཡང་ མཇལ་ཁ་གནང་ཡོདཔ་ཨིན།
སྐྱབས་རྗེ་རིན་པོ་ཆེ་མཆོག་གིས་ རིགས་གཅིག་མཁས་པའི་མཆོག་འཛིན་གྱི་ སློབ་ཕྲུག་ཤོ་ཐེངས་དང་པ་ལུ་ ལག་ཁྱེར་གནང་ཡོདཔ་མ་ཚད་ སློབ་ཕྲུག་ཤོ་ཐེངས་གཉིས་པ་ཚུ་ལུ་ཡང་ བཀྲ་ཤིས་ལེགས་དར་གནང་ཡོདཔ་ཨིན།
ལྷག་པར་དུ་ སྐྱབས་རྗེ་རིན་པོ་ཆེ་མཆོག་གིས་ རྫོང་ཁག་ ༡༨ ཀྱི་རབ་སྡེ་ཁག་གི་ ཡོངས་འབྲེལ་ཁ་བྱང་འདི་ གསར་བཏོན་མཛད་གནངམ་དང་གཅིག་ཁར་ ༼ལྷོ་འབྲུག་བསྟན་པའི་མཛེས་རྒྱན་རྣམས།༽ཟེར་བའི་ལས་འགུལ་འདི་ཡང་ འགོ་འབྱེད་རྟེན་འབྲེལ་བརྩི་གནང་ཡི། ལས་འགུལ་འདི་ཡང་ གཞུང་གྲྭ་ཚང་གཞི་བཙུགས་འབད་དེ་ མི་ལོ་ ༤༠༠་འཁོར་བའི་དུས་སྟོན་བརྩི་སྲུང་གི་དོན་ལུ་ དམིགས་བསལ་གྱི་ལས་འགུལ་ཅིག་ཨིནམ་མ་ཚད་ འབྲུག་གི་བླ་ན་མེད་པའི་བླ་སློབ་ཡོངས་ལུ་ གུས་བཏུད་ཞུ་ནིའི་དོན་ལུ་ འགོ་འབྱེད་མཛད་གནང་ཡི།
Source: Zhung Dratshang གཞུང་གྲྭ་ཚང་། Central Monastic Body of Bhutan